Matvælastofnun hefur skráð íslenskt lambakjöt sem verndað afurðaheiti á grundvelli laga nr. 130 frá 2014 um vernd afurðaheita sem geta vísað til uppruna, landsvæðis eða hefðbundinnar sérstöðu. Enska útgáfan Icelandic lamb er einnig skráð. Lambakjöt er fyrsta íslenska afurðin sem fær vernd samkvæmt lögunum.

Tilgangur laganna er að vernda afurðaheiti til að stuðla að neytendavernd, auka virði afurða og koma í veg fyrir óréttmæta viðskiptahætti. Íslensku lögin taka mið af reglugerð Evrópusambandsins um gæðakerfi fyrir landbúnaðarafurðir og matvæli. Samkvæmt sérstökum samningi Íslands og Evrópusambandsins mun vernd afurðaheitins gilda á öllu evrópska efnahagssvæðinu. Umsækjandi var Markaðsráð kindakjöts sem mun í framhaldinu sækja um evrópsku vottunina. Sá nánar um hana hér.

„Þetta er mjög mikilvægt skref fyrir okkur til að undirstrika sérstöðu okkar“ segir Svavar Halldórsson, framkvæmdastjóri Markaðsráðs kindakjöts. „Við erum stolt af því að lambakjötið, þjóðarréttur Íslendinga, sé fyrsta íslenska afurðin sem hlýtur þennan heiður.“
Rúmlega 1.400 afurðir eru þegar skráðar í evrópska kerfinu og tæplega 200 eru í umsóknarferli. Sjá nána hér.

Þar má nefna nokkrar af frægustu matvörum Evrópu eins og ítalska Parma skinku, franskan Camembert de Normandie ost og sænskan Kalix Löjrom kavíar. „Flestar fínustu matvöru í Evrópu hafa þessa vottun og með henni er lambakjötið komið í flokk með bestu ostunum, olíunum og hráskinkunni í Evrópu. Það mun hjálpa okkur í markaðssetningu gagnvart erlendum ferðamönnum hér og inn á kröfuharða sérmarkaði erlendis“ segir Svavar Halldórsson.